Кина денеска ги повика сите страни во конфликтот на Блискиот Исток да работат на завршување на војната, предупредувајќи за поголем број на жртви ако конфликтот продолжи.

„Ако војната продолжи, таа ќе донесе повеќе жртви и загуби и ќе доведе до ширење на последиците од ситуацијата“, изјави портпаролот на кинеското Министерство за надворешни работи, Лин Џиан, пред новинарите во Пекинг.

„Војната не е од корист за никого. Сега е потребно активно да се промовираат мировните преговори, да се искористат можностите за мир и да се работи на завршување на војната“, додаде Лин.

Тој нагласи дека Кина ги поддржува сите напори што придонесуваат за намалување на тензиите.

„Сите страни мора да работат во иста насока и да создадат услови за започнување вистински мировни преговори што се значајни и искрени“, рече тој.

Кина, додаде тој, е подготвена да продолжи да игра конструктивна улога во процесот.

Во врска со американскиот претседател Доналд Трамп и неговата одложена посета на Кина, Лин рече дека дипломатскиот ангажман на шефовите на држави игра незаменлива улога во билатералните односи меѓу двете земји.

Двете страни разговараат за посетата на претседателот Трамп на Кина.

Патувањето, првично закажано за 31 март до 2 април, беше одложено откако Трамп изјави дека ќе остане во Вашингтон поради војната меѓу САД и Израел против Иран.

Најавувајќи ги новите датуми за посетата, Белата куќа во среда соопшти дека Трамп ќе отпатува во Пекинг за да се сретне со претседателот Си Џинпинг на 14 и 15 мај.