Турскиот министер за трговија Омер Болат изјави дека е потпишан протокол меѓу Туркије и Сирија, во рамките на состанокот на Заедничкиот економски и трговски комитет (ЏЕТКО), како сеопфатна мапа на патот за економска интеграција, регионален развој и обнова.

По билатералната средба, турските и сириските официјални претставници во Истанбул го одржаа првиот состанок на ЏЕТКО.

Во изјавата по средбата Болат истакна дека ова претставува историска пресвртница во економските и трговските односи меѓу Туркије и Сирија.

Тој посочи дека првиот состанок на комитетот, чие одржување беше потпишано во Анкара на 5 август 2025 година, успешно е завршен врз основа на заемна доверба.

Болат изјави дека за време на состанокот страните ја потврдиле својата решителност да постигнат балансиран и одржлив обем на билатерална трговија за заемна корист на двете земји.

„Разговаравме за сите видови решенија и механизми за да го доведеме обемот на нашата билатерална трговија, кој минатата година достигна 3,7 милијарди долари, прво до 5 милијарди, а потоа до зацртаната цел од 10 милијарди долари“, додаде тој.

Тој напомена дека покрај одлуката за продлабочување на соработката, особено во стратегиските сектори, како текстилот, земјоделството, прехранбениот сектор и машинската индустрија, двете земји се согласиле и за размена на информации за регулаторните рамки за да се обезбеди предвидливост во трговијата со земјоделски производи.

„Исто така, со големо задоволство ги зближуваме водечките компании и инвеститори од двете земји преку Форумот за бизнис и инвестиција на Туркије и Сирија, кој се одржува на маргините на овој состанок“, рече тој.

Осврнувајќи се на неодамнешните тешкотии и војни во регионот и светот, Болат истакна дека тие му придаваат големо значење на непреченото остварување на надворешната трговија со повеќе алтернативи.

Можност за проширување на соработката

Мухамед Нидал ал-Шаар, сириски министер за економија и индустрија, изјави дека Сирија почнала да работи на добра основа и во добро поле со Туркије, истакнувајќи дека двете земји ја продолжуваат својата соработка во економските, културните и социјалните сфери.

Нагласувајќи дека Туркије и Сирија имаат специфични односи, Шаар објасни дека двете земји наоѓаат можност да ги прошират тие односи преку сериозни проекти.

„Освен економската соработка, секако дека постои можност за проширување и ние тргнавме по тој пат“, рече тој.

Тој нагласи дека индустријалците продолжуваат со работата на индустриската зона што се планира да се воспостави во Алепо,.

Тој истакна дека ова ќе има директно влијание врз другите проекти и деловното опкружување.

Во меѓувреме, во рамките на состанокот на JETCO, двете земји потпишаа договор за соработка во областа на безбедноста на производите и инспекцијата, техничките прописи, стандардизацијата, сообразноста и метрологијата.