Претседателката на Европската комисија, Урсула фон дер Лајен, денес изјави дека Европската унија подготвува пакет за економска поддршка за Ерменија во почетен износ од 50 милиони евра, откако Русија воведе некои трговски ограничувања за Ерменија.

„Денес разговарав со (ерменскиот) премиер Никола Пашинјан за неодамнешните руски ограничувања насочени кон Ерменија. Ова не е ништо помалку од економска принуда и е неприфатливо“, рече Фон дер Лајен, објави Ројтерс.

Таа додаде дека со проширување на извозните ограничувања за ерменските производи, Москва ги користи економските односи како „оружје“ за политички притисок.

„Ние добро го знаеме овој прирачник. Затоа Европа цврсто стои зад Ерменија. Ние подготвуваме пакет за поддршка од ЕУ“, рече таа.

Рускиот амбасадор во Ерменија, Сергеј Копиркин, пак, во неделата бил повикан во Москва на консултации во врска со чекорите на ерменското раководство кон ЕУ, кои според руското Министерство за надворешни работи, се штетни за соработката во рамките на Евроазиската економска унија (ЕАЕУ).

Претходно претседателите на Русија, Белорусија, Казахстан и Киргистан ја повикаа Ерменија да одржи референдум за приклучување кон Европската унија (ЕУ) или останување во Евроазиската економска унија (ЕАЕУ).

Ерменскиот премиер Никол Пашинјан тогаш рече дека ако земјата ја напушти ЕАЕУ, тоа нема да го стори одеднаш, туку на планиран начин и дека референдум за ова прашање нема да биде потребен.