Министерот за надворешни работи и надворешна трговија на Северна Македонија, Тимчо Муцунски, во среда објави дека за време на состанокот во Скопјe, го примил министерот за надворешни и европски работи на Хрватска, Гордан Грлиќ Радман, кој е во дводневна работна посета.
„Ги потврдивме нашите традиционално пријателски односи и интензивен политички дијалог. Исто така, се согласивме за заеднички интерес за продлабочување на соработката, со посебен акцент на економијата, трговијата, енергетиката, здравството, културата и туризмот“, напиша Муцунски на социјалната мрежа X.
Тој изрази благодарност до Хрватска за нејзината континуирана поддршка за европската перспектива на Западен Балкан и нејзината подготвеност да сподели искуства од процесот на пристапување во ЕУ.
Според соопштението од хрватското Министерство за надворешни и европски работи, министрите ги истакнале одличните билатерални односи и силната соработка во рамките на НАТО алијансата.
„Соработката меѓу Хрватска и Северна Македонија се карактеризира со отворен политички дијалог и меѓусебна доверба. Северна Македонија останува цврсто посветена на спроведување на стратешки реформи, особено во областите на судството, владеењето на правото и борбата против корупцијата“, се вели во соопштението.
Хрватска, додаде Министерството, обезбедува техничка и експертска поддршка на Северна Македонија преку твининг проекти, споделувајќи искуство од процесот на пристапување во ЕУ. Економската соработка меѓу двете земји продолжува да се развива преку зголемена трговија, инвестиции и заеднички проекти во туризмот, енергетиката и инфраструктурата.
Северна Македонија, преку своето претседателство со ЕУСАИР(EUSAIR), потврди проактивна и конструктивна улога во регионот, со посебен фокус на проширувањето на ЕУ, прекуграничната соработка, прашањата поврзани со младите, демографските предизвици и одржливиот туризам.
Двете страни нагласиле дека континуираниот дијалог и координацијата со меѓународните партнери ќе останат основа на стабилноста и европската интеграција на регионот.
