Во Музејот на Македонија. Во него верувале или не има помеѓу 18 500 и 20 000 делови од македонски народни носии. Шеесетина народни носии се изложени во етнолошката поставка. 

„Носиите се од цела Македонија од нејзиниот цел етнички предел. Имаме носии од Пиринска, Егејска Македонија, но и се од сите заедници коишто живеат на територијата на денешна Македонија. Датираат од периодот на деветнаесетиот и почетокот на дваесетиот век” вели за ТРТ Балкан Наде Костадиновска Спасеновска кустос во музејот.

Постојат неколку начини на кои носиите можат да се најдат во Музејот на Македонија.

„Некои ги подаруваат, некои се со откуп направени. Денес исто така постојат луѓе коишто сакаат да подарат носија пред се затоа што се емотивно врзани со носијата таа им припаѓала на нивните баби, прабаби, мајки и сака да биде добро сочувана и знае дека во музејов ние ќе го направиме токму тоа и дека и таа нoсија некогаш ќе биде дел од некоја изложба” објаснува Костадовска Спасеновска.

Според неа најчесто се земаат оние носии кои ги нема во депоата

„Доколку е носија што ја немаме тоа е првиот критериум според кој треба да ја прибереме и да ја сочуваме. Понатаму доколку е носијата целосна тоа е одлична можност за ние како етнолози да го имаме целото тоа парче. Доколку се повеќе парчиња одвоени од различни носии или пак недостасуваат од целосната носија, треба да видиме дали се тие добро сочувани. Доколку се добро сочувани секако дека ќе ги примиме во музејот. На ист начин ги третираме како и целосните носии” вели таа.

Мијачките носии од Галичник, Папрадиште, Ореше, Смилево, Дебарско Поле се меѓу најрепрезентативните во колекцијата, со многу везови и накит.  Се издвојуваат и носиите од мариовскиот крај.

„Мариовската е наjтешка невестинска носија. Тежи околу 45 до 50 килограми.Коцелот можете да го видите во задниот дел. Тој е тежок околу десет оки. Направен е целиот од волна во плетенчиња и во топови во долниот дел и невестата го носела прикачен во задниот дел на грбот. И тој морала да го носи на денот на свадбата. Бил долг колку што е висока невестата, а потоа го носела до раѓањето на првото дете” истакнува Костадиновска Спасеновска.

Машката носија од Мариовско се разликува по везот и елекот кај младоженецот.

Задолжително во долниот дел имаат прво кошула, а потоа и еден ‘встан одозгора што се облекува кој има многу клинови за да биде што понабрано, пораскошен младоженецот, особено кога ќе игра на оро да биде исто убав како и невестата.