Белата куќа: Следната рунда преговори меѓу САД и Иран најверојатно ќе се одржи во Исламабад
Порано денес, Ал Џезира објави дека е постигнат значителен напредок во преговорите за нуклеарната програма на Иран и дека Пакистан се надева дека ќе постигне опиплив напредок
Следната рунда преговори меѓу Соединетите Американски Држави и Иран најверојатно ќе се одржи во Исламабад, изјави денес портпаролката на Белата куќа, Каролин Ливит.
Таа рече дека Пакистан е единствениот посредник во преговорите кои се „продуктивни и тековни“, според Ројтерс.
Таа додаде дека медиумските извештаи дека САД побарале продолжување на сегашниот прекин на огнот не се вистинити.
„Видов извештаи, лоши известувања утрово дека формално побаравме продолжување на прекинот на огнот. Тоа не е вистина. Сè уште сме многу зафатени со преговори во овој момент“, рече Ливит.
Според неа, американската делегација „има добро чувство“ за изгледите за постигнување договор.
Кога новинарите ја прашаа колку долго ќе трае блокадата на Ормускиот теснец, таа рече дека не може „да поставува рокови во име на американскиот претседател“.
„Но што се однесува до блокадата, како што знаете, таа е целосно имплементирана и се спроведува против бродови од сите земји што влегуваат или излегуваат од иранските пристаништа. Исто така, видов некои лажни извештаи за тоа. Ова ги вклучува сите ирански пристаништа во Арапскиот Залив и Оманскиот Залив, а нашите американски сили во регионот ја поддржуваат слободата на пловидба за бродовите што транзитираат низ теснецот до и од неиранските пристаништа. Значи, знам дека некои во печатот се збунети околу тоа. Ние ја поддржуваме слободата на пловидба, само не во однос на кој било танкер или брод што би и користел на економијата на Иран додека траат овие преговори“, рече Ливит.
На 11 април, во Исламабад се одржаа разговори меѓу американската делегација, предводена од потпретседателот на САД Џеј Д. Венс, и иранската делегација, предводена од претседателот на иранскиот парламент, Мохамед Багер Калибаф, но не беше постигнат договор за траен мир.
Порано денес, Ал Џезира објави дека е постигнат значителен напредок во преговорите за нуклеарната програма на Иран и дека Пакистан се надева дека ќе постигне опиплив напредок.