Илија Срдановиќ, носителот на „Студентската листа“, ги повика граѓаните на Србија да не посегнуваат по никаков вид насилство.

Во видео-порака објавена на Инстаграм, Срдановиќ апелираше до граѓаните да останат смирени и достоинствени во текот на остатокот од изборниот процес, како и по него.

„Изборите сè уште не се завршени, а изборните резултати не се прогласени. Мораме да останеме достоинствени до самиот крај. Не посегнувајте по никаков вид насилство. Ова е барање од вашата ’Студентска листа‘ и вашето студентско движење“, изјави Срдановиќ.

Неговиот апел следеше откако група граѓани упаднаа во српскиот медиум „Информер“ барајќи од раководството да се извини за упатените навреди во текот на изборната кампања, додека главниот уредник Драган Вучичевиќ тврдеше дека медиумот се држи во заложништво и бараше полициска интервенција, опколен од демонстрантите.

Нападот врз „Информер“ беше осуден и од Александар Вучиќ претседател на СНС кој го призна изборниот пораз, додека пак претставниците на „Студенти во блокада“ порачаа дека не поддржуваат упади во медиуми и институции, ниту повикуваат на такви постапки.