Двајца Палестинци биле убиени, а четворица се ранети во израелски напад со беспилотно летало во парк во источниот дел на градот Газа во четврток, што е најновото кршење на договорот за прекин на огнот од 10 октомври.

Медицински извор изјави за Анадолу дека две тела и четворица повредени лица биле донесени во Баптистичката болница Ал-Ахли откако беспилотно летало гранатирало цивилен собир во паркот Ал-Махата во населбата Туфа во источениот дел на Газа.

Израелската војска, пак, соопшти дека убила Палестинец во јужна Газа, тврдејќи дека ја преминал „жолтата линија“.

Армијата соопшти дека нејзините сили кои дејствуваат во јужна Газа идентификувале „вооружен осомничен“ кој ја преминал „жолтата линија“ и наводно се приближил до нивната позиција. Во соопштението се вели дека војниците го застрелале и убиле „за да ја отстранат заканата“.

„Жолтата линија“ е привремена граница утврдена со договор за прекин на огнот што стапи на сила на 10 октомври. Таа ги одделува областите каде што се распоредени израелските сили, околу 53 проценти од Газа, од западните области каде што Палестинците можат да се движат.

Според Министерството за здравство на Газа, најмалку 618 Палестинци се убиени, а повеќе од 1.660 се ранети во израелските напади во Газа од прекинот на огнот.

Прекинот на огнот ја запре двегодишната израелска офанзива во која од октомври 2023 година загинаа повеќе од 72.000 Палестинци, а повеќе од 171.000 беа ранети.

90 проценти од инфраструктурата на палестинската енклава беше уништена.