Унгарскиот премиер Петер Маѓар изјави во понеделник, по средбата со претседателот Тамаш Шулјок, дека ако претседателот не поднесе оставка, владата ќе покрене правни постапки за негово отстранување од функцијата.
Унгарската централнодесничарска партија Тиса по убедливата победа на изборите во април и падот на Владата на Виктор Орбан вети дека ќе отстрани неколку личности назначени од Орбан на клучни јавни позиции во последните 16 години.
Маѓар го повика Шулјок - избран на почетокот на 2024 година од пратениците од партијата Фидес на Орбан - да се повлече, обвинувајќи го дека не успеал да го претставува националното единство по главните прашања и дека им служи на интересите на Орбан и неговата влада.
Шулјок одби да поднесе оставка.
„Му кажав на претседателот дека доколку го задржи својот став и не поднесе оставка, денес ќе ги информирам ... пратениците од Тиса за нашите законски предлози и веднаш ќе ги започнеме потребните процедури“, рече Маѓар.
Тој рече дека законодавниот процес ќе трае околу еден месец и ќе вклучува „отстранување на сите марионети“ кои учествуваа во „демонтирањето на владеењето на правото и демократијата“.
Незаконски ултиматум
Партијата Фидес на Орбан ја обвини Маѓар за издавање „незаконски ултиматум“ и рече дека Шулјок го исполнува својот законски мандат, кој трае до 2029 година и не може да биде отстранет од функцијата.
Шулјок претходно беше претседател на највисокиот суд на Унгарија, функција на која беше избран и од Фидес во 2016 година.
Претседателската функција во Унгарија е во голема мера церемонијална, но Шулјок може да врати закони во парламентот за повторно разгледување или да ги проследи законите до Уставниот суд, што потенцијално ќе ја забави или блокира реформската агенда на Маѓар.
Маѓар изјави дека ќе го искористи двотретинското парламентарно мнозинство на неговата партија за да го измени уставот и другото законодавство за да го принуди Шулјок да се повлече од функцијата.
