Пратениците од деветтиот состав на Собранието на Косово усвоија заеднички изработена декларација за заштита на Ослободителната војска на Косово (ОВК) и против, како што е оценето, неправедната одлука на Специјализираните совети за четворицата поранешни лидери на ОВК во Хаг.

Пратениците со 99 гласа „за“, без гласови „против“ и без воздржани, ја усвоија Декларацијата за осудителната пресуда против Хашим Тачи, Кадри Весели, Реџеп Селими и Јакуп Красниќи.

Во декларацијата, која пред пратениците ја прочита претседателката на Собранието, Албулена Хаџиу, Собранието изрази длабока загриженост поради првостепената пресуда против поранешните лидери на ОВК, го оцени како неприфатлив заклучокот за постоење на заедничка криминална цел и побара од сите државни институции да ги преземат неопходните дејства за заштита на вистината и чистотата на ослободителната војна на Косово.

„Собранието повикува на изработка на заедничка државна стратегија, во чии рамки ќе се координираат сите правни, институционални и дипломатски активности за заштита и афирмирање на целосната историска вистина за праведната борба за слобода и ослободување на Косово“, се наведува во декларацијата што ја прочита Хаџиу.

Понатаму во декларацијата се наведува дека во Косово во периодот 1998-1999 година, постоењето на заедничко криминално здружување за протерување на Албанците од Косово веќе е потврдено со пресуди на Меѓународниот кривичен трибунал за поранешна Југославија против политичките, воените и полициските челници на Југославија и Србија.

„(Декларацијата) се спротивставува на секој обид да се изврти историската вистина за Косово, да се доведе во прашање неговата ослободителна војна или да се изедначат народот што се бореше за слобода и опстанок со режимот што го угнетуваше“, се наведува во декларацијата.

По усвојувањето на оваа декларација, Демократската партија на Косово (ПДК), на чија иницијатива беше изработена декларацијата, им се заблагодари на пратениците на Собранието на Косово за усвојувањето, а побара во продолжение да се изгласаат и измените и дополнувањата на Законот за Специјализираните совети на Косово во Хаг.

„Гласањето за законот е следниот чекор за да се даде институционален одговор на барањата што ги поставивме. ПДК ќе продолжи да се ангажира за заштита на праведната борба на ОВК и за правичен процес против нејзините поранешни лидери“, се наведува во соопштението на ПДК.

На 16 септември Тачи и Красниќи беа прогласени за виновни и осудени на по 25 години затвор, Весели беше осуден на 18 години затвор, а Селими на 13 години затвор од страна на Специјализираните совети.

Поранешните лидери на ОВК беа осудени за воени злосторства, вклучително и незаконско или произволно притворање, сурово постапување, тортура и незаконско убивање.