Во близина на гасоводот што ги поврзува Србија и Унгарија е пронајден експлозив со голема разорна моќ, а претседателот на Србија, Александар Вучиќ, по тој повод во неделата разговарал со унгарскиот премиер Виктор Орбан.

Сомнителни предмети биле откриени во реонот на селата Велебит, Трешњевац и Војвода Зимоњиќ во општина Кањижа, во непосредна близина на гасната инфраструктура, јави Танјуг.

На терен се ангажирани околу 140 припадници на полицијата и војската, додека пребарувањето продолжува. По налог на Вишото јавно обвинителство во Суботица, во акцијата учествуваат припадници на криминалистичката и воената полиција, како и други единици на Војската на Србија.

Повеќе патни правци во општина Кањижа се блокирани, вклучувајќи ги делниците меѓу Трешњевац и Војвода Зимоњиќ, како и патот кон селото Велебит. Операцијата се спроведува комбинирано – со претрес од копно и надзор од воздух, а над подрачјето надлетуваат и хеликоптери.

Вучиќ соопшти дека надлежните единици пронашле експлозив со голема разорна моќ и фитили потребни за негово активирање, и дека за првичните резултати од истрагата го информирал Орбан за време на телефонски разговор.

Тој додаде дека унгарската страна ќе биде информирана за понатамошниот тек на истрагата, додека надлежните органи продолжуваат со работа на утврдување на сите околности и можни закани за критичната инфраструктура.