Претседателот на Собранието на Република Северна Македонија, Африм Гаши оствари средба со претседателот на Домот на Народите на Парламентарното Собрание на Босна и Херцеговина, Кемал Адемовиќ, соопшти собраниската прес-служба.

„Претседателот Гаши изрази задоволство од одличните односи помеѓу двете држави, кои не се обременети со билатерални прашања, а како дополнителен мост на поврзување ја нагласи улогата на Бошњаците во Македонија и диаспората на Македонија во Босна и Херцеговина. Гаши подвлече дека неопходно е подобрување на сообраќајните врски помеѓу двете држави како основа за подобра економска и секаква друга соработка и во тој контекст реферираше на обновување на железничката врска како и воспоставување на авио линија Скопје - Сараево. Во светло на претстојната Конференција на Јадранско – Јонската иницијатива, претседателот Гаши истакна дека темите на Конференцијата, мирот, парламентарната дипломатија и напредокот коридорите 8 и 10 се индикатор за интересот на државите и напорите на регионот на Западен Балкан за интеграција во Европската Унија“, информираа од Собранието.

Претседателот Адемовиќ се заблагодари за срдечниот пречек и ги сподели очекувањата од Конференцијата со која претседава Северна Македонија.

„Босна и Херцеговина високо го цени оддавањето на почит на Собранието кон жртвите на геноцидот во Сребреница со одбележувањето на годишнината на овој трагичен настан. Нагласи дека регионалната соработка и Берлинскиот процес се особено важни за напредокот на Регионот кон Европската Унија“, се додава во соопштението.

Соговорниците се согласија дека билатералната соработка и взаемните посети на сите нивоа и во повеќе сфери треба да се интензивираат.