Главниот преговарач на Украина, Рустем Умеров, денес изјави дека е постигнат „огромен напредок“ во тековните мировни преговори со Русија во однос на прашањата за „безбедноста и просперитетот“.

За време на заедничката прес-конференција во главниот град на Обединетите Арапски Емирати, Абу Даби, по последната рунда руско-украински мировни преговори со посредство на САД, Умеров им се заблагодари на американските претставници Стив Виткоф и Џаред Кушнер за нивниот придонес во преговорите. Тој наведе дека во текот на изминатата година се воделе разговори во различни формати, вклучително и со учество на европски страни.

„Постигнат е огромен напредок во однос на прашањата за безбедноста и просперитетот, а за тоа ќе зборуваме дополнително“, изјави Умеров, кој моментално ја извршува функцијата шеф на украинската Служба за надворешно разузнавање. Тој не изнесе дополнителни детали.

Давид Арахамија, парламентарен лидер на украинската владејачка партија Слуга на народот, кој исто така се обрати на прес-конференцијата во Абу Даби, ги опиша трилатералните преговори одржани во изминатите два дена како „едни од најтешките“. Тој изрази надеж дека претстојната размена на затвореници меѓу Москва и Киев, за која претходно на прес-конференцијата зборуваше Кушнер, ќе опфати „голем“ број луѓе.

Арахамија изјави дека се блиску до проширување на опсегот на преговорите од трилатерален во мултилатерален формат, притоа напоменувајќи дека е постигнат „голем напредок“ и по други прашања, за кои, како што рече, во моментов не може да откријат детали.

„Ве охрабрувам да ја посетите Москва, потоа да се вратите кај нас во Даблин, да одржите втора сесија и колку што е можно поскоро да го објавите датумот за следната рунда (мировни преговори). Сметам дека имаме добар залет за да дојдеме до решение пред почетокот на новата година“, додаде Арахамија.

Изјавите на украинските претставници се дадени по завршувањето на дводневните трилатерални разговори во Абу Даби, кои се одвиваа со посредство на САД и започнаа вчера. Ова е прва директна трилатерална мировна средба по преговорите одржани во Женева во февруари.

На заедничката прес-конференција Кушнер им изјави на новинарите дека тој и Виткоф утре (четврток) ќе отпатуваат во Москва на разговори со рускиот претседател Владимир Путин, при што наведе дека таму ќе ги „прецизираат бројките“ за размена на затвореници, за што е постигнат договор по преговорите вчера и денес.