Претседателот на САД, Доналд Трамп, се сретна со привремената претседателка на Венецуела, Делси Родригез, на маргините на Генералното собрание на ОН во среда, што е нивна прва средба откако американските сили го заробија тогашниот претседател Николас Мадуро во јануари.

Средбата се одржа за време на приемот што го организираше Доналд Трамп на маргините на Генералното собрание на ОН и беше прва посета на Делси Родригез на САД откако ја презеде функцијата.

Таа треба да се обрати на Генералното собрание на ОН во среда.

„Одржавме историска средба со претседателот на САД, Доналд Трамп, на која разговаравме за зајакнување на билатералните односи меѓу нашите земји и за унапредување на агендата за соработка во стратешки области како што се енергетиката, рударството, безбедноста и други прашања од заеднички интерес“, изјави Родригез на X.

Таа изрази благодарност до американската администрација за нејзината „цврста поддршка“ по земјотресите од 24 јуни и ѝ се заблагодари на Вашингтон за помошта што му ја пружи на Каракас во процесот на „реинтеграција во мултилатералните форуми“.

Родригез истакнала дека Каракас и Вашингтон делат историска поврзаност и дека сега двете страни се „повикани да ја насочуваат таа врска преку дијалог“, потврдувајќи дека нејзината администрација ќе води дипломатија насочена кон „постигнување конкретни резултати и колективни придобивки за венецуелскиот народ“.

На Трамп и Родригез им се придружија државниот секретар на САД, Марко Рубио, секретарот за финансии Скот Бесент, шефицата на кабинетот на Белата куќа, Сузи Вајлс, и Стивен Милер, помошничка на претседателот и заменик-шеф на кабинетот за политички прашања.

Венецуелската делегација, во која се вклучени потпретседателот за економија, министерот за нафта и претставници од државната нафтена компанија ПДВСA, е фокусирана на привлекување инвестиции во земјата, изјавија извори блиски до делегацијата за Ројтерс.

Трамп воспостави работен однос со Родригез, која беше потпретседател на Мадуро.

Критичарите велат дека Вашингтон ја заобиколи опозицијата предводена од Марија Корина Мачадо и се откажа од барањата за слободни избори во корист на договор за нафта и инвестиции со привремената влада.

Мала група Венецуелци, пак, протестираа во Њујорк во вторник барајќи избори.

Во говорот пред Генералното собрание на ОН, Трамп го нарече Мадуро диктатор одметнат од законот, рече дека стотици политички затвореници биле ослободени по неговото апсење и ја претстави американската воена операција како доказ дека САД ќе ја користат својата неспоредлива воена моќ за да ги заштитат своите интереси на западната хемисфера.