Александар Вучиќ синоќа во Белград поднесе оставка од функцијата претседател на Србија, наведувајќи дека сака да учествува на претстојните предвремени парламентарни избори како обичен граѓанин.
Во зградата на Претседателството на Србија, по обраќањето пред собраните граѓани, Вучиќ ја потпиша својата оставка.
Тој изјави дека во понеделник наутро ќе ги предаде должностите на претседателката на српскиот парламент, Ана Брнабиќ, која ќе ја извршува функцијата вршител на должноста претседател. Додаде дека претседателски избори мора да се одржат до крајот на декември.
Вучиќ рече дека оној што ќе ја добие довербата на граѓаните на претстојните предвремени парламентарни избори на 25 октомври, ќе мора да ги зачува мирот и стабилноста, истовремено почитувајќи ги и штитејќи ги националните интереси.
Тој објави дека поднесува оставка и им се заблагодари на граѓаните кои во два наврати му ја укажале својата доверба.
Вучиќ ја извршуваше функцијата претседател на Србија нешто помалку од два мандата, во вкупен период од речиси девет и пол години: првиот мандат траеше од 2017 до 2022 година, а вториот од април 2022 година до крајот на септември 2026 година.
Според Законот за претседател, претседателот на Народното собрание распишува предвремени претседателски избори кои треба да се одржат најдоцна три месеци откако претседателот на Републиката ќе биде спречен да ги извршува своите должности или откако неговиот мандат ќе заврши пред истекот на рокот за кој бил избран.
Законот исто така предвидува дека во случај на оставка на претседателот на Републиката, претседателот на Народното собрание – во овој случај претседателката Ана Брнабиќ – ја презема таа улога во траење од најмногу три месеци. Од денот на распишувањето на изборите до денот на гласањето мора да поминат најмалку 30, а најмногу 60 дена, при што за ден на гласање се одредува неработен ден.
