Турската одбранбена компанија Aселсан соопшти дека потпишала договор во вредност од 1,1 милијарда долари за испорака на системи за противвоздушна одбрана на странски купувач.

Во известувањето доставено во вторникот до турската Платформа за јавно обелоденување (Public Disclosure Platform), Aселсан наведе дека очекува овој договор да придонесе за зголемување на приходите на компанијата.

Компанијата не го откри идентитетот на купувачот, ниту пак прецизираше за кои системи за противвоздушна одбрана станува збор, а не беше даден ниту распоред за испорака.

Aселсан напредуваше од 43. на 40. место на листата „Тoп 100“ на Дефенс Њуз (Defense News) за 2026 година, која ги рангира одбранбените компании врз основа на нивните приходи остварени во претходната година.

Компанијата стана првата турска фирма од одбранбениот сектор што влезе меѓу најдобрите 40 и остана највисоко рангирана меѓу петте турски компании вклучени во овогодинешната листа.

Aселсан испорачува топови, ракетни лансери, радари и системи за контрола на огнот за турската повеќеслојна мрежа за противвоздушна одбрана.

Нејзиниот систем за контрола на огнот Коркут може да ги координира 35-милиметарските противавионски топови со ракетните лансери за краток дострел „Хисар A+“.

Семејството „Хисар“ го вклучува и „Хисар-O“, кој е наменет за противвоздушна одбрана на средни височини.

За заштита на долги растојанија, Аселсан соработува со турскиот производител на ракети Рокетсан и со институтот за одбранбени истражувања Тубитак САГЕ на развојот на системот за противвоздушна одбрана Сипер.

Според турскиот Секретаријат за одбранбена индустрија, системот Сипер е дизајниран за справување со закани од воздух, вклучително и борбени авиони, крстосувачки ракети и беспилотни летала.