Американски борбен авион беше соборен над Иран денеска, првпат од почетокот на војната пред повеќе од еден месец.

Според извештаите на американските медиуми, еден од двајцата членови на екипажот на авионот е спасен, додека Белата куќа потврди дека претседателот Доналд Трамп „е информиран“ за ситуацијата.

Претходно иранските државни медиуми објавија фотографии и видеа на кои наводно се гледаат остатоци од местото на несреќата, вклучувајќи ги и деловите од авионот и едно од исфрлените седишта. Првичните проценки врз основа на снимките сугерираат дека авионот можеби бил борбен авион Ф-15.

САД загубија три борбени авиони Ф-15 во пријателски оган во Кувајт на 1 март, но ова е првото потврдено соборување на американски авион од непријателски оган во овој конфликт - и првото потврдено соборување од непријателски оган за повеќе од две децении.