Претставници на администрацијата на Трамп во неделата на затворени брифинзи со персоналот на американскиот конгрес признаа дека нема разузнавачки информации што укажуваат дека Иран планирал прв да нападне врз американските сили, изјавија два извори запознаени со ова прашање.

Соединетите Американски Држави и Израел во саботата ги започнаа најобемните напади врз Иран во последните децении, при што досега го убија врховниот лидер ајатолахот Али Хамнеи, потопија ирански воени бродови и нападнаа повеќе од 1.000 цели, изјавија претставниците.

Но изјавите од неделата пред Конгресот се чини дека го поткопуваат еден од клучните аргументи за војна изнесени од високи претставници на администрацијата на Трамп.

Тие им кажаа на новинарите еден ден претходно дека претседателот Доналд Трамп одлучил да ги започне нападите делумно поради индикациите дека Иранците би можеле да ги нападнат американските сили на Блискиот Исток „можеби превентивно“.

Трамп, рече еден од претставниците, нема „да седи мирно и да дозволи американските сили во регионот да страдаат“.

„Претставници на Пентагон ги информираа демократските и републиканските членови на персоналот на неколку национални безбедносни комитети во Сенатот и Претставничкиот дом повеќе од 90 минути за нападот на САД во Иран“, изјави претходно портпаролот на Белата куќа, Дилан Џонсон.

На брифинзите, претставници на администрацијата нагласиле дека балистичките ракети и силите на Иран во регионот претставуваат непосредна закана за интересите на САД, но немаше разузнавачки информации дека Техеран прв би ги нападнал американските сили, изјавија за Ројтерс два извори, кои сакаа да останат анонимни.

Трамп рече дека целта на нападот, за кој се очекува да трае со недели, била да се осигури дека Иран не може да има нуклеарно оружје, да се ограничи неговата ракетна програма и да се отстранат заканите за САД и нивните сојузници.

Тој ги повика Иранците да се кренат и да ја соборат владата.

Сепак, демократите го обвинуваат Трамп дека води војна по свој избор и ги доведуваат во прашање неговите аргументи за напуштање на мировните преговори, за кои медијаторот Оман рече дека сè уште имаат шанса за успех.

Прашањата за оправданоста на војната доаѓаат откако американската војска во неделата ги откри првите американски жртви од конфликтот.

Тројца американски војници биле биени, а петмина ранети, соопшти Централната команда на САД во неделата, додавајќи дека неколку други американски војници претрпеле помали повреди од шрапнели и потреси на мозокот.

Американските авиони и воени бродови погодија повеќе од 1.000 ирански цели откако Трамп нареди почеток на офанзивата, соопшти војската.

Нападите вклучуваат бомбардери Б-2 кои исфрлаат бомби од 900 кг врз зацврстени, подземни ирански ракетни објекти.

Анкета на Ројтерс/Ипсос во неделата покажа дека 27 проценти од Американците ги одобруваат нападите, додека 43 проценти не ги одобруваат, а 29 проценти не се сигурни.