Портпаролот на Кремљ, Дмитриј Песков, денес изјави дека дијалогот меѓу претседателот на Русија, Владимир Путин и претседателот на Соединетите Американски Држави, Доналд Трамп, е „конструктивен“ и покрај постојните несогласувања.
„Тие навистина водат конструктивен дијалог, и покрај одредени разлики во ставовите што може да постојат“, рече Песков на прес-конференција, објави Спутник.
Зборувајќи за изјавите на Трамп дека интензивирањето на непријателствата меѓу Русија и Украина би можело да придонесе за побрзо постигнување мир, Песков рече дека Москва не го гледа тоа како враќање на Вашингтон кон политиката на ескалација, туку како погрешна проценка на американската администрација.
„Не гледаме дека САД се враќаат на патот на ескалација на односите со Русија. Напротив, би рекле дека гледаме одредени заблуди во американската администрација и Белата куќа - заблуди дека ескалацијата и воениот притисок можат да придонесат за мирно решавање на конфликтот“, рече тој.
Песков оцени дека таков пристап е погрешен и нагласи дека зголемувањето на тензиите не може да придонесе за мировниот процес.
„Зголемувањето на тензиите и потезите што водат кон ескалација на никаков начин нема да придонесат за мирно решавање на конфликтот“, рече портпаролот на Кремљ.
Руското министерство за надворешни работи, пак, во среда ги осуди одлуките донесени на самитот на НАТО во Туркије, предупредувајќи дека тие би можеле да имаат катастрофални последици, откако алијансата најави нова воена помош за Украина и ја потврди својата посветеност на колективната одбрана.
Портпаролката на руското МНР, Марија Захарова, изјави дека приоритетите на НАТО остануваат непроменети.
„Тоа се милитаризација на европскиот континент, зајакнување на одбранбените капацитети, подготовки за вооружен конфликт со Русија и, секако, помош за Украина. Штета е што стратезите на НАТО не застанаа ни за момент и не размислија. Можеби тогаш немаше да донесат такви неодговорни одлуки што би можеле да доведат до катастрофа не само за алијансата, туку и за целиот свет,“ рече Захарова.
