Европскиот совет во петокот усвои мерка за помош во вредност од 15 милиони евра во рамките на Европскиот мировен фонд (ЕМФ), чија цел е зајакнување на одбранбените капацитети и способности на Армијата на С. Македонија, како и нејзината оперативна подготвеност.

Оваа одлука се надоградува на поддршката што веќе е обезбедена преку билатералните пакети за помош од 2023 и 2024 година, со што вкупната поддршка од ЕПФ за С. Македонија досега изнесува 38 милиони евра.

Новата мерка за помош, исто така, ќе ја зголеми способноста на земјата да придонесува во мисиите и операциите на Заедничката безбедносна и одбранбена политика (ЗБОП) на ЕУ, како и во меѓународните коалиции.

Каја Калас, висока претставничка за надворешни работи и безбедносна политика и претседателка на Советот за надворешни работи, изјави дека „ова вклучува сè, од опрема за собирање разузнавачки информации и надзор до опрема за обука во борба. Нашата поддршка ќе ѝ помогне на Северна Македонија да придонесе кон регионалната стабилност и безбедност, што е важно не само за Западен Балкан, туку и за ЕУ“.

Таа уште еднаш изрази поддршка за патот на С. Македонија кон членство во ЕУ и рече дека со нетрпение ја очекува својата прва посета следниот месец за „понатамошно дискутирање на нашата заедничка агенда“.

Денешната одлука го потврдува континуираниот ангажман со Скопје во областа на безбедноста и одбраната, особено по потпишувањето на Партнерството за безбедност и одбрана меѓу ЕУ и С. Македонија во ноември минатата година.

„Тоа, исто така, го одразува целосното почитување на земјата на Заедничката надворешна и безбедносна политика на ЕУ“, соопшти Европскиот совет.

Европскиот инструмент за мир ќе ѝ обезбеди на Армијата на Северна Македонија опрема поврзана со разузнавање, надзор и извидување, како и електронско војување; повеќенаменски и инженерски возила; комуникациски и информациски системи; како и опрема за борбена обука. Доколку е потребно, ќе бидат обезбедени и помошни материјали и услуги, вклучително и оперативна обука.

Европскиот мировен фонд беше основан во март 2021 година за финансирање на активности во рамките на Заедничката надворешна и безбедносна политика со цел спречување на конфликти, зачувување на мирот и зајакнување на меѓународната безбедност и стабилност. Особено, тоа ѝ овозможува на ЕУ да финансира активности наменети за зајакнување на капацитетите на трети земји и регионални и меѓународни организации во врска со воените и одбранбените прашања.