Пезешкијан: Иран нема да попушти пред прекумерни барања

Иранскиот претседател Масуд Пезешкијан изјави дека неговата земја нема да попушти пред прекумерни барања за својата нуклеарна програма, откако Техеран ги продолжи разговорите со САД.

Тој, исто така, во средата изјави дека Иран е подготвен за „секаква верификација“ на својата нуклеарна програма и инсистираше дека не се стреми кон атомско оружје.

Иран и САД ги продолжија преговорите минатата недела за прв пат по војната со Израел минатиот јуни, во која САД извршија напади врз нуклеарните постројки во Иран.

„Нашиот Иран нема да попушти пред агресијата, но ние го продолжуваме дијалогот со сета наша сила со соседните земји со цел да воспоставиме мир и спокојство во регионот“, рече Пезешкијан.

Тој зборуваше на плоштадот Азади во главниот град Техеран, по повод 47-годишнината од Исламската револуција на Иран.

„Нашата земја, Иран, нема да попушти пред нивните прекумерни барања“, додаде тој.

Иран сака разговорите да останат фокусирани исклучиво на неговата нуклеарна програма, додека САД исто така сакаат да се дискутира за балистичката ракетна програма на Иран и неговата поддршка за групите во регионот.

Иран инсистира дека неговата нуклеарна програма е мировна, иако САД и нивниот сојузник Израел веруваат дека се стреми да се здобие со нуклеарно оружје.

Секоја година, поддржувачите на иранското раководство се собираат во голем број за да ја одбележат годишнината од револуцијата со која беше соборен шахот поддржан од САД во 1979 година.

Дописник на АФП на плоштадот Азади забележал големо безбедносно присуство, поголемо отколку во претходните години.

Иран минатиот месец сведочеше на протести низ целата држава, а кои предизвика големи судири со владините безбедносни сили и репресија, при што САД се заканија со воена акција во поддршка на демонстрантите.