Министерот за надворешни работи на Франција, Жан-Ноел Баро, изјави во понеделник дека израелските и американските „еднострани“ напади во Иран требало да се дискутираат во колективните тела формирани токму за оваа цел, како што се Обединетите нации.

„Секој можеше да ги преземе своите одговорности, бидејќи само со одење пред Советот за безбедност (на Обединетите нации) употребата на сила може да ја стекне потребната легитимност“, им рече Баро на новинарите по состанокот во министерството во Париз, додавајќи дека во оваа фаза не се пријавени француски жртви.

Длабока загриженост

Кина во понеделник повика на прекин на огнот, изразувајќи „длабока загриженост“ поради регионалното прелевање на американските и израелските воздушни напади врз Иран, кои потоа возвратија со таргетирање на американски бази во регионот на Заливот.

„САД и Израел извршија воени напади врз Иран без овластување од Советот за безбедност на ОН, што го крши меѓународното право“, изјави портпаролката на Министерството за надворешни работи, Мао Нинг, за новинарите во Пекинг.

„Кина е длабоко загрижена за прелевањето на конфликтот што ги погодува соседните земји. Кина верува дека суверенитетот, безбедноста и територијалниот интегритет на земјите од Заливот исто така треба целосно да се почитуваат“, рече Мао.

Врховниот лидер на Иран, Али Хамнеи, беше убиен, меѓу другите, во американско-израелските напади во саботата.

„Ги повикуваме сите страни да ги прекинат воените дејствија и да спречат понатамошна ескалација на конфликтот“, рече Мао.

Барање за ублажување на тензиите

За тоа дали Пекинг бил известен од Вашингтон пред да започне заеднички напади врз Иран, Мао рече: „Кина не била однапред известена во врска со воената акција на САД“.

Портпаролката, исто така, ги отфрли тврдењата дека Пекинг и Техеран „се блиску до постигнување договор“ за купување на суперсонични противбродски ракети ЦM-302.

„Релевантните извештаи не се вистинити. Како одговорна голема земја, Кина отсекогаш ги исполнувала своите меѓународни обврски“, рече Мао, додавајќи дека Кина „се спротивставува на злонамерните асоцијации и рекламирања и се надева дека релевантните страни ќе сторат повеќе за да помогнат во ублажувањето на тензиите“.

Поради тековниот конфликт, функционерот рече дека повеќе од 3.000 кинески граѓани се евакуирани од Иран.