Велешанецот Виктор Мазнев е вистиски херој кој секојдневно им го спасува животот на многу напуштени или болни животни. Неговата мисија е да им обезбеди трајно живеалиште или привремено прибежиште. Денес стационарот во Војница, близу Велес каде и живее наликува и на мини зоолошка градина. Кучињата се најбројни. Ги има четириесетина, а низ стационарот годиниве минале околу 2 000. Грижата и за коњите, козите, мачките, живината е негово секојдневие.

„Уште на 14 години бев некој што ги хранеше животните по улица и имав кучиња што додека одев низ град ме следеа и доаѓаа со мене. Идејата дојде од тоа што гледав колку многу има кучиња на улица на коишто им треба помош и сфатив дека не може да бараме некој друг да го прави тоа. Кога ќе го сфатиме тоа и кога ќе разбереме дека на нив им треба помош ние сме тие кои треба да ја преземеме акцијата”, вели Виктор.

Неговата улога била клучна кога дел од животните речиси сигурно немало да преживеат без човечка грижа.

„Многу од нив сум ги нашол фрлени во контејнер. Поради тоа што луѓето не ги стерилизираат своите миленици. Ги пуштаат да се парат слободно, а подоцна плодот го фрлаат во контејнер. Има преку 20-30 кучиња што ги имам изгледано на цуцла, што треба грижа на секои два три часа, хранење. Мачиња исто имам хрането на цуцла. Јариња имам хрането на цуцла, јагне имам хрането на цуцла. Се грижиш буквално како да си им мајка. И мора да пијат млеко на секои два три часа”, раскажува Виктор во разговор за ТРТ Балкан.

Тој себеси се става во втор план. Задоволувањето на потребите на милениците често бара ангажман од утро до мрак.

„Стануваш од спиење, од причина што имам дома девет кучиња што спијат со мене, прво го фаќаш џогерот па потоа го пиеш кафето. Подоцна доаѓаат животните што се надвор. Мораш да поминеш сите да ги нахраниш, додека тие јадат, почнуваш со живината, потоа одиш кај коњите, подоцна се враќаш пак кај кучињата, чистиш и гледаш да завршиш додека не те стемни”, истакнува Мазнев.

Виктор не размислува за друг ангажман во иднина. Негова опсесија и приоритет се животните.

„ И кога ќе ги разбереш дека и тие носат чиста душа, многу почиста од човечката. Дека немаат задни намери, дека секогаш се искрени кон тебе. Дека нема кај нив лицемерие или пак некои такви работи сфаќаш дека тие се едни чисти суштества на светот како што се и децата”, вели Мазнев.

Илјадници животни со помош на Виктор Мазнев биле вдомени и низ Европа.