Австралиската авиокомпанија Квантас го откажа летот од Рим до Перт откако во авионот беа откриени креветни бубачки, што предизвика доцнење на некои патници до два дена, објавија локалните медиуми.

Патниците на летот QF5 од Перт до Рим на 9 октомври пријавија дека биле каснати од инсекти и им беа дадени антихистаминици по медицински совет, објави Д Сиднеј Морнинг Хералд (The Sydney Morning Herald).

Авиокомпанијата потоа го откажа повратниот лет во саботата, QF6, за да им овозможи на тимовите за одржување длабинско чистење на Боингот 787 Дримлајнер.

„Искрено им се извинуваме на патниците за откажувањето на услугата од Рим до Перт во саботата, што им овозможи на нашите инженери и тимови за одржување да извршат длабинско чистење на авионот откако беше идентификуван проблем на мал број седишта во економска класа“, изјави портпарол на Квантас.

На засегнатите патници им беше обезбедено сместување и повторни резервации на алтернативни летови во рок од 48 часа од нивното закажано заминување.

„Квантас“ соопшти дека неговите авиони редовно се чистат и дезинфицираат на секои 50 дена како превентивна мерка.

Според австралискиот „Better Health Channel“, креветните бубачки се паразити што се хранат со крв чии каснувања можат да предизвикаат чешање и оток, но не се верува дека пренесуваат болести на луѓето.