Ракометарите на Данска немаа милост и убедливо со 38:24 ја победија Норвешка, додека со двоцифрена разлика славеше и Шведска во пресметката со Швајцарија, а резултатот на крајот беше 34:21. Со овие два меча, се комплетираше групната фаза од Европското првенство, па веќе се познати и полуфиналните двојки.
Данците во Хернинг одржаа уште една ракометна лекција, овојпат против Норвешка. Интересно е дека норвешка парираше до пред крајот на првиот дел кога беше 17:16 за Данска. Од тој момент, Данска заигра многу подобро и разликата само се зголемуваше. Беше 26:19, а прв пат до двоцифрена предност Данска стигна кога поведе со 32:22, за на крајот да стигне и до највисоки 14 гола предност.
Во Групата 1, ракометарите на Германија ѝ се приклучија на Данска во полуфиналето, триумфирајќи во голем стил во Хернинг над бранителот на титулата Франција (38:34).
Германците имаа предност од самиот почеток на натпреварот и на полувреме заминаа со водство од 19:15, а во продолжението предноста достигна и највисоки плус 5 голови (24:19).
Французите се обидоа резултатски да се вратат во игра, дојдоа во финишот до гол негатива (32:31), но Германија одговори со серија од 4-1 и ја задржа предноста до крајот на дуелот. Франција на тој начин заврши на четвртата позиција, поазди Португалија.
Во Групата 2 Хрватска одигра три фантастични меча во главната фаза и победи на сите три. По триумфите над Швајцарија и Словенија, вечерва Коцкестите со пресврт славеа и над Унгарија, и тоа со 27:25. Со овој триумф Хрватска заврши на првото место во групата.
Коцкестите до победата стигнаа до голем пресврт во второто полувреме. На почетокот од вториот дел Унгарија водеше со 18:14, но потоа следуваше фуриозна игра на Хрватите и со серија од 8:2, поведоа со 22:20. Во драматична завршница Коцкестите ја задржаа предноста и стигнаа до победа вредна полуфинале.
Шведска со 13 разлика ја победи Швајцарија, но на крајот заврши на третото место во групата и на крајот ќе се бори против Португалија за петата позиција на континенталниот собир, последна што води директно на следното Светско првенство.
Завршницата на Европското првенство ќе се игра во Хернинг. Полуфиналињата се закажани за 30 јануари со почеток во 17:45 и 20:30 часот, а претходно, натпреварот за петтото место ќе се игра од 15:00 часот.
