Одборот за мир, иницијатива предводена од САД, во понеделник изјави дека израелската војска целосно ќе се повлече од Појасот Газа само откако Хамас ќе се разоружи.

„Спротивно на неточните извештаи, повлекувањето на Израелските сили зад „Жолтата линија“ ќе се случи само откако ќе заврши процесот на разоружување, како што Хамас се обврза пред медијаторите“, соопшти Одборот за мир на социјалната мрежа X, додавајќи дека ова вклучува лесно и тешко оружје, како и на мрежата од тунели.

Објавата дојде откако американскиот претседател Доналд Трамп минатата недела тврдеше дека е постигнат договор за разоружување на палестинското движење на отпорот Хамас. Според планот објавен од Одборот за мир, Хамас ќе го предаде своето оружје на палестинската привремена администрација.

Сепак, од Хамас изјавија дека спроведувањето на планот зависи од прекинот на израелските воени операции во Газа. Групата, исто така, изјави дека ќе предаде тешко оружје само по целосното повлекување на израелските сили од Појасот Газа и воспоставувањето палестинска држава.

Од друга страна, Израел инсистира дека ќе се повлече од Газа само кога Хамас ќе биде целосно разоружан и ја отфрла можноста оружјето сè уште да биде складирано во областа.

Одборот за мир, кој вклучува земји како Аргентина, Унгарија, Албанија, Белорусија, Саудиска Арабија, Катар и Туркије, беше формиран на почетокот на годината за да го спроведе мировниот план за Газа, кој го посредуваше Доналд Трамп.

Иницијативата предизвика многу контроверзии, а повеќето земји од Европската Унија ја сметаат за конкуренција на Обединетите нации и одбија членство во организацијата или прифатија статус на набљудувач.