Мексико повикува на смиреност по воената ликвидација на нарко шефот „Ел Менчо“

Мексиканската претседателка Клаудија Шајнбаум изјави дека постои „апсолутна координација“ со сите државни институции по воената ликвидација на лидерот на картелот „Нова генерација на Халиско“, Немесио Осегера Сервантес, познат како „Ел Менчо“.

„Постои апсолутна владина координација; мора да останеме информирани и смирени“, рече претседателката Шајнбаум, додавајќи дека „активностите се одвиваат нормално низ поголемиот дел од Мексико“.

Шајнбаум ги призна немирите предизвикани од операцијата, истакнувајќи дека Министерството за одбрана известило за „разните блокади и други реакции“ што следеле по операцијата од страна на федералните сили.

„Секој ден работиме за мир, безбедност, правда и благосостојба на Мексико“, рече таа.

Министерството за одбрана на Мексико соопшти дека специјалните сили ја спровеле операцијата во Тапалпа, Халиско, познато упориште на картелот, со цел апсење на Осегуера.

„За време на оваа операција, мексикански воен персонал беше нападнат, а во одбрана на својот физички интегритет, тие ја одбија агресијата. Ова резултираше со смрт на четворица членови на криминалната група на местото на настанот, а тројца други беа тешко ранети, кои ги загубија животите за време на нивниот воздушен превоз до Мексико Сити“, соопшти министерството.

„Меѓу нив е и Рубен „Н“ (алијас Менчо); сепак, надлежните органи ќе бидат задолжени за форензичките активности за да ја потврдат неговата идентификација.“

Министерството додаде дека се уапсени уште двајца членови на картелот, а запленети се оклопни возила и разни оружја, вклучувајќи ракетни лансери способни да соборуваат авиони.

Убиството на „Ел Менчо“ предизвика насилна реакција во неколку мексикански сојузни држави, со пријавени блокади на патишта, палење возила и вооружени судири.

Гувернерот на Халиско, Пабло Лемус Наваро, прогласи црвена тревога и ги откажа часовите со физичко присуство во училиштата.