Директорката на Колеџот на Европа и поранешна висока претставничка на ЕУ за надворешна и безбедносна политика Федерика Могерини, беше приведена денеска како дел од истрага за можна измама при користењето на средствата на Европската Унија.

Како што објавува „Бриселс тајмс“ во рамии на истрагата се приведени три лица во Бриж и Брисел. Приведен е и Стефано Санино, директор на Директоратот на Европската комисија за Блискиот исток, Северна Африка и Персискиот залив.

Како што е наведено, Могерини моментално е во полициски притвор.

Според Канцеларијата на Европскиот јавен обвинител, овие притворања се дел од истрага за сомнение за фаворизирање и нелојална конкуренција.

На барање на обвинителството, федералната полиција интервенираше во дипломатската служба на Европската Унија во Брисел (ЕЕСА), во неколку згради на Колеџот на Европа во Бриж и во домовите на осомничените.

Истрагата се однесува на доделувањето на деветмесечна програма за обука за идни европски дипломати од страна на Европската служба за надворешна акција на престижниот Колеџ на Европа.

Наводните прекршоци датираат од периодот 2021-2022 година.

Како што е наведено, потенцијалните прекршоци вклучуваат „измама при доделување јавни договори“, како и „корупција, судир на интереси и кршење на професионална тајна“.

Колеџот на Европа е високообразовна институција која обучува многу европски државни службеници, а истражителите се обидуваат да утврдат „дали Колеџот на Европа или неговите претставници биле однапред информирани за критериумите за избор“ како дел од тендерската постапка што ја започна дипломатската служба на ЕУ за програмата за обука.