Виртуелната Амбасада на Соединетите Американски Држави (САД) во Иран денес ги повика американските граѓани да ја напуштат земјата „веднаш“ доколку е можно и да имаат план за заминување кој не се потпира на помош од американската Влада.
„Зголемени безбедносни мерки, затворени патишта, прекини во јавниот превоз и блокирања на интернетот, Владата на Иран продолжува да го ограничува пристапот до мобилните, фиксните и националните интернет-мрежи. Авиокомпаниите продолжуваат да ги ограничуваат или откажуваат летовите до и од Иран“, соопшти Амбасадата во безбедносно предупредување објавено на нејзината веб-страница.
„Државјаните на САД треба да очекуваат континуирани прекини на интернетот, да планираат алтернативни средства за комуникација и, доколку е безбедно да го сторат тоа, да размислат за заминување од Иран по копнен пат кон Ерменија или Туркије“, додаде Амбасадата.
Во соопштението се предупредува дека државјаните на САД се соочуваат со значителен ризик од испрашување, апсење или притвор во Иран, препорачувајќи да избегнуваат демонстрации и „да бидат незабележливи“.
Се вели дека доколку заминувањето е невозможно, луѓето треба да најдат „безбедна локација“ во нивниот дом или друга безбедна зграда и да чуваат залихи на „храна, вода, лекови и други основни продукти“.
Во меѓувреме, иранскиот министер за надворешни работи, Абас Аракчи, денес повика на „меѓусебно почитување“ пред разговорите со САД за иранската нуклеарна програма и други прашања.
Аракчи напиша на X дека Иран пристапува кон дипломатијата „со отворени очи“ и со сеќавањето на изминатата година, нагласувајќи дека се ангажира „со добра волја и цврсто стои на своите права“.
Индиректните разговори меѓу Иран и САД ќе се одржат денес во главниот град на Оман, Мускат.
САД и Иран претходно се согласија да одржат разговори во Истанбул во петок, а другите земји од Блискиот Исток ќе учествуваат како набљудувачи.
Сепак, иранската страна во вторник побара разговорите да се преместат во Оман и да бидат билатерални, со цел да се фокусираат исклучиво на нуклеарните прашања, а не на теми како што се ракетните програми, кои се приоритет за САД и земјите од регионот.
