Претседателот на Србија, Александар Вучиќ, изјави дека „се плаши дека работите отишле предалеку по темата за војната меѓу Европа и Русија“, особено кога тоа го кажа францускиот генерал Фабиен Мандон, и оцени дека Србија се вооружила мудро и ќе продолжи да ја зајакнува својата армија и да се обидува да изгради заштитна купола.

„Во таа смисла, мора да се подготвиме. Мора да продолжиме многу да инвестираме и да работиме за да можеме дополнително да ја заштитиме земјата, да ги зајакнеме нашите сили за воздушна одбрана, пред сè да се обидеме да изградиме еден вид заштитна купола над Србија, што е многу тешко и бара многу пари“, рече Вучиќ.

Претседателот нагласи дека нема понатаму да зборува за тие планови.

„Србија мора да продолжи да ја опремува војската и да ја зајакнува. Се вооружуваме мудро. Мораме да направиме сè за да можеме да го заштитиме нашиот народ и земја од секој потенцијален агресор“, рече Вучиќ во телевизиско интервју, одговарајќи на прашање во врска со изјавата на началникот на Генералштабот на француските вооружени сили дека француските вооружени сили се подготвуваат за можна војна со Русија во рок од три или четири години.

Српскиот претседател изјави дека не може да открие која е третата страна со која Русите преговараат за НИС, но предупреди и дека времето истекува и дека ниту Вашингтон ниту Москва, ниту кој било друг, не смее да мисли дека тој не е доволно решен да ги заштити српските интереси во прашањето за НИС.

„Рековме дека ќе го прифатиме секое нивно барање, но тие мора да знаат едно дека нашето време истекува, нашето време истекува, ни остануваат уште десет дена и само не дозволувајте никој да помисли дека не сум доволно решен да ги заштитам српските интереси, никому“, рече Вучиќ и нагласи дека „Србија ќе се справи со сè“.

Вучиќ, меѓу другото ја коментираше и веста дека руските сопственици на Српската нафтена индустрија испратиле барање до американскиот OFAC со кое бараат продолжување на работната лиценца, врз основа на преговори со трета страна.

Вучиќ нагласи дека руската држава испратила барање и дека тие преговараат со трета страна, но дека не може да каже која е таа.

Српскиот претседател изјави дека во четврток ќе отпатува за Париз каде што ќе се сретне со францускиот претседател Емануел Макрон и нагласи дека тоа ќе биде исклучително важна средба.

„Ќе разговараме за сите важни геополитички, регионални прашања, прашања од билатералната соработка, европскиот пат на Србија и сите важни теми“, рече Вучиќ.