Граѓаните на Њујорк денес излегоа на гласање на жестоко оспоруваните избори за градоначалник.
Избирачките места беа отворени во 6 часот наутро по локално време и ќе може да се гласа до 21 часот. Според изборната комисија на Њујорк, претходното гласање траеше од 25 октомври до 2 ноември, при што беа поднесени повеќе од 735.000 гласачки ливчиња - рекорден број за градот.
Во центар на изборната трка е демократскиот кандидат Зохран Мамдани, 34-годишник роден во Кампала, Уганда, од родители Индијци, кој од седумгодишна возраст живее во Њујорк. Ако победи, Мамдани ќе стане првиот муслиман и Јужноазиец на чело на градот.
Мамдани, кој отворено се декларира како демократски социјалист, својата кампања ја темели врз достапноста и социјалните услуги, ветувајќи бесплатен јавен превоз, универзален детски надоместок, градски продавници за храна, кирии со стабилизирани цени и зголемување на минималната плата на 30 долари на час до 2030 година.
Според него, овие мерки ќе се финансираат преку зголемување на корпоративниот данок на 11,5% - исто како во соседен Њу Џерси - и воведување 2% данок на доход за лицата што заработуваат повеќе од 1 милион долари годишно.
Мамдани, исто така, изјави дека доколку стане градоначалник, ќе нареди апсење на израелскиот премиер Бенјамин Нетанјаху ако влезе во градот, повикувајќи се на налогот за негово апсење од Меѓународниот кривичен суд поради воени злосторства во Газа.
Негови главни противници се поранешниот гувернер на Њујорк, Ендру Куомо и републиканскиот кандидат Куртис Слива, десничарски активист и радиоводител.
Куомо се кандидира како независен по поразот на демократските прелиминарни избори во јуни, обидувајќи се да се претстави како најискусен кандидат за водство на градот, имајќи ја предвид неговата долга политичка кариера и улогата за време на пандемијата на КОВИД-19.
Компилација од анкети составена од веб-страницата „Риал Клир Политикс“ покажува дека Мамдани води со просек од 14,3%, што е огромна предност пред изборите.
Анкетата му дава 46,1% поддршка на Мамдани, 31,8% на Куомо, а Слива има 16,3%. Засега не е јасно дали би можело гласачите на Слива да го поддржат Куомо, кој долги години беше истакнат демократ.
