Легендарниот фудбалер на Партизан, Хајдук и Галатасарај, Џевад Прекази, почина во неделата на 70-годишна возраст, потврди белградскиот ФК Партизан.

„Преки, ти благодариме за сè и почивај во мир“, порачаа од Партизан, наведувајќи дека времето и местото на погребот дополнително ќе бидат соопштени.

Од Прекази се прости и турскиот Галатасарај, клубот во кој остави длабока трага и се стекна со статус на клупска легенда.

„Длабоко сме ожалостени поради загубата на Џевад Прекази, кој со златни букви го запиша своето име во историјата на Галатасарај и со својата фудбалска вештина и карактер остави неизбришлива трага во нашите сеќавања“, соопшти истанбулскиот клуб.

Од Галатасарај порачаа дека Прекази, чии голови и настапи одбележаа една генерација навивачи, засекогаш ќе остане во нивните срца.

„Никогаш нема да те заборавиме“, наведоа од клубот.

Прекази е роден на 18 август 1957 година во Косовска Митровица. Во Партизан пристигнал како јуниор, а за првиот тим настапувал од 1976 до 1983 година, одигрувајќи 175 натпревари и постигнувајќи 23 гола, според податоците на белградскиот клуб.

Со Партизан освоил три титули шампион на Југославија, во 1976, 1978 и 1983 година, како и Купот Митропа во 1978 година. По заминувањето од Белград, настапувал за сплитски Хајдук, со кој во 1984 година го освоил Купот на Југославија.

Најголема трага во меѓународната кариера оставил во Туркије, каде што од 1985 до 1991 година го носел дресот на Галатасарај.

Со истанбулскиот клуб освоил две последователни титули шампион на Туркије, во 1987 и 1988 година, а бил и еден од клучните играчи на генерацијата што во 1989 година стигнала до полуфиналето на Купот на европските шампиони.

Особено се памети неговиот гол против Монако во четвртфиналето на ова натпреварување, кога постигнал погодок со удар од околу 40 метри.

Во текот на шесте сезони во Галатасарај одиграл 185 натпревари и постигнал 40 гола, а една улица во Истанбул го носи неговото име.

Во интервју за Анадолу во 2021 година, Прекази зборувал за периодот поминат во Галатасарај и подемот на клубот кон крајот на осумдесеттите години.

Тој потсетил дека Галатасарај пред доаѓањето на неговата генерација чекал 14 години за титулата шампион на Туркије, а со освојувањето на две последователни шампионски титули успеале да ја прекинат таа серија и да ги постават темелите за нови успеси.

„Мојата генерација се потруди тоа повеќе да не биде така“, изјавил тогаш Прекази, говорејќи за доминацијата на градскиот ривал Фенербахче во периодот кога пристигнал во Истанбул.

По Галатасарај настапувал и за турските клубови Алтај и Бакирќојспор, а по завршувањето на играчката кариера се посветил на тренерската работа, вклучително и на работата со младите фудбалери на Партизан и ОФК Белград.

Прекази ќе остане запаметен по силната лева нога, прецизните удари и значајната улога во успесите на Партизан и Галатасарај во текот на седумдесеттите и осумдесеттите години на минатиот век.