Кинескиот претседател Си Џинпинг денеска повика на „доверба“, континуиран дијалог и „здрава конкуренција“, на средбата со американскиот претседател Доналд Трамп во Белата куќа.

Пекинг и Вашингтон треба да ја зајакнат комуникацијата, рече Си, нагласувајќи дека и покрај разликите во нивните „национални околности“, двете земји можат подобро да се разберат, да најдат заеднички јазик и да изградат меѓусебна доверба преку „искрен, длабински и континуиран дијалог“.

Тој се заложи за зајакнување на контактите меѓу владините ресори на Кина и САД, вклучувајќи ги оние за надворешни работи, економија, финансиска соработка, спроведување на законот и размена меѓу луѓето.

Тој исто така изрази поддршка за поголема размена меѓу законодавните тела на двете земји.

„Треба да коегзистираме во мир“, рече Си, додавајќи дека како две големи земји, тие „имаат корист од соработката, а во конфронтација и двете ќе загубат“.

Си нагласи дека Кина и САД не треба да ја избегнуваат конкуренцијата, но таа треба да биде „здрава“ и „во разумни рамки“. Тој повика на „трка во меѓусебно достигнување“, наместо на „боречки натпревар“ со нулта сума, во кој едниот победува, а другиот губи.

Кина и САД „мора да се придржуваат до принципот на отсуство на конфликт и конфронтација“, истакна тој, повикувајќи на редовен дијалог и подобрени механизми за комуникација и превенција на кризи меѓу нивните војски.

„Може да се надмине ’Тукидидовата замка‘“, рече тој, осврнувајќи се на ризикот од конфликт меѓу растечка сила и веќе етаблирана сила – концепт што потекнува од американскиот писател Херман Вук, кој се повикува на старогрчкиот историчар.