Палестинската милитантна група Хамас денес изјави, во свое име и во име на другите палестински фракции што ги предводи во Појасот Газа, дека резолуцијата поднесена од САД до Советот за безбедност на Обединетите нации е „опасна“ и претставува „обид за потчинување на Појасот Газа на меѓународна власт“.

Во соопштението, кое го објави „Тајмс оф Израел“, се наведува дека палестинските фракции отфрлаат каква било клаузула поврзана со разоружувањето на Газа или кршењето на „правото на палестинскиот народ на отпор“.

Хамас, исто така, отфрли какво било странско воено присуство во Појасот Газа, наведувајќи дека тоа би претставувало кршење на палестинскиот суверенитет.

„Секоја меѓународна сила мора да биде директно подредена на ОН и да работи во координација со официјалните палестински институции“, се вели во соопштението.

Хамас го отфрли учеството на израелски трупи во силите на ОН.

ОН ќе гласа до крајот на денот за резолуција со која ќе се поддржи сеопфатниот план за прекин на огнот во Газа на американскиот претседател Доналд Трамп, според кој безбедноста во Газа ќе ја обезбедат Меѓународните сили за стабилизација (ИСФ), додека управувањето ќе биде предадено на Палестинската самоуправа, под надзор на мировен комитет претседаван од Трамп.

Мировниот план предвидува Газа да биде демилитаризирана и обновена, иако Хамас досега одбиваше да се согласи со прашањето за демилитаризација.