Турскиот систем за противвоздушна одбрана „Челична купола“ се развива со нови способности со цел да ги задоволи сите безбедносни потреби на земјата, изјави денес директорот на компанијата „Рокетсан“, Мурат Икинџи, јавува Анадолу.

Во изјава за Анадолу, Икинџи рече дека „Челична купола“ претставува напредна архитектура за противвоздушната одбрана, која постојано ќе се надградува со нов капацитет и технологии за справување со новите закани.

„Ова е инфраструктура на која континуирано ќе додаваме нови способности, ќе интегрираме нови технологии и ќе развиваме мерки против новите закани. Работиме на тоа системот да може да ги задоволи сите потреби за противвоздушна одбрана на нашата земја“, изјави тој.

Икинџи истакна дека „Рокетсан“ продолжува со масовно производство на широк спектар системи, вклучувајќи противтенковски, крстосувачки и противбродски ракети, балистички ракети, како и ракети за воздушна одбрана.

Тој нагласи дека балистичките ракети имаат значајно место во портфолиото на компанијата, додавајќи дека производството и испораките на балистичката ракета „Тајфун“ и крстосувачката ракета „СОМ“ се во тек.

„Постојано работиме. Производствените активности во ‘Рокетсан’ продолжуваат без забавување“, рече Икинџи.

Тој додаде дека компанијата има за цел брзо да го зголеми својот капацитет на производство преку нови инвестиции, оценувајќи дека актуелната регионална ситуација го наложува тоа.

„Вложуваме максимални напори да ја зајакнеме одбраната на нашата земја и да го забрзаме производството во оваа област“, истакна тој.

Икинџи нагласи дека развојот на домашни системи за противвоздушна одбрана е од исклучително значење, додавајќи дека „Челична купола“ е еден од најважните одбранбени проекти на Туркије.

„Ова е систем што го развиваме самостојно, во соработка со ‘Аселсан’, ‘Рокетсан’ и ‘ТУБИТАК САГЕ’.

Фактот што ги произведуваме сите негови компоненти ни овозможува да произведуваме онолку ракети, радарски и батериски системи колку што ни се потребни, кога и да ни се потребни“, рече тој.

Според него, „Челична купола“ е меѓу најважните програми за одбрана на Туркије, поради што е неопходно брзо зголемување на производството.

Икинџи посочи дека противвоздушната одбрана е исклучително комплексна област и дека ниту една земја не може да тврди дека има изградено совршен систем.

„Продолжуваме да додаваме нови способности и карактеристики во согласност со променливите закани“, рече тој.

Додаде дека „Рокетсан“ работи на бројни проекти и најави дека нови системи – од ракети за воздушна одбрана и ракети воздух-воздух, до нови балистички ракети – ќе бидат постепено претставени од 2026 година и понатаму.

„Челична купола“ претставува интегрирана напредна архитектура за воздушна одбрана на Туркије, составена од домашно развиени радари, ракети, системи за електронско војување и командни системи за заштита на воздушниот простор од закани на различни висини и дострели.