Осумстотини егзекуции што требаше да се извршат во Иран беа откажани откако американскиот претседател Доналд Трамп ги предупреди властите во Техеран да не убиваат демонстранти, објави синоќа Белата куќа.

Портпаролката на Белата куќа, Каролин Ливит, на прес-конференција изјави дека Трамп вчера бил информиран дека „800-те егзекуции што беа закажани за среда се одложени“.

Таа додаде дека Трамп внимателно ја следи ситуацијата на терен во Иран.

Ливит рече дека Трамп и неговиот тим го предупредиле Техеран дека ќе има „тешки последици ако продолжат убиствата поврзани со владината репресија“.

Трамп во среда изјави дека му било кажано дека убиствата во иранското задушување на протестите низ целата земја се намалуваат и дека верува дека нема моментален план за масовни егзекуции, дури и кога тензиите меѓу Техеран и Вашингтон остануваат високи.

„Ќе бидеме многу вознемирени ако продолжат егзекуциите“, рече Трамп.

Тој не ја исклучи можноста за воена акција на САД, велејќи дека ќе „следи како се одвива процесот“, истакнувајќи дека американската администрација добила „многу охрабрувачка порака“ од Иран.

Протестите во Иран започнаа на 28 декември 2025 година поради девалвацијата на локалната валута, иранскиот риал, а на 8 јануари, по повикот на Реза Пахлави, синот на шахот на Иран, кој беше соборен во 1979 година, протестните маршеви се интензивираа низ целата земја.

Истиот ден, интернетот беше исклучен, а во неколку ирански градови протестите се претворија во судири со полицијата и беа придружени со скандирања против иранскиот политички систем.

Беше објавено дека имало жртви и меѓу безбедносните сили и меѓу демонстрантите.

Група за човекови права со седиште во САД во четврток соопшти дека бројот на жртви во протестите во Иран достигна 2.677.

Иранските власти, обвинувајќи ги САД и Израел за организирање на немирите, на 12 јануари објавија дека ситуацијата е ставена под контрола.