Израел ѝ дозволи на палестинската група Хамас да влезе во областите под контрола на Армијата во Газа за да ги бара телата на настраданите заложници, објавија денес израелските медиуми.

Израелскиот „Канал 12“, повикувајќи се на безбедносни службеници, соопшти дека Хамас работи во соработка со Црвениот крст и египетските тимови во последните 24 часа за да ги лоцира останките на заложниците во областите што сè уште се окупирани од израелската Армија надвор од „жолтата линија“.

„Жолтата линија“ е замислена линија што ги одделува областите што моментално ги окупира израелската Армија во Газа од оние од каде што се повлече.

Медиумот соопшти дека Израел и Хамас размениле информации за проценетите локации на телата преку посредници во текот на викендот за да го забрзаат процесот.

Израел вчера потврди дека им дозволил на екипите на Црвениот крст и на египетските екипи зад „жолтата линија“ во Газа да помогнат во потрагата по останките на заложниците.

Според првата фаза од договорот за прекин на огнот што стапи на сила на 10 октомври, Хамас ослободи 20 живи израелски заложници и телата на уште 16 други. Останките од 12 заложници сè уште се во енклавата.

Планот за прекин на огнот предвидува и обнова на Газа и воспоставување нов управувачки механизам без Хамас.

Според палестинските власти, во геноцидната војна на Израел во Газа се убиени над 68.500 луѓе, а повеќе од 170.300 се повредени од октомври 2023 година.