Руските сопственици на Нафтената индустрија на Србија (НИС) поднесоа барање до Канцеларијата за контрола на странски средства (OФAЦ) на Министерството за финансии на САД со барање за продолжување на лиценцата за работа, врз основа на преговори со трета страна, објави денес српската министерка за рударство и енергетика Дубравка Ѓедовиќ Хандановиќ, додавајќи дека државата Србија официјално го поддржала барањето.

Во барањето се наведува дека руската страна е подготвена да ја отстапи контролата и влијанието врз компанијата НИС на трета страна, изјави Ѓедовиќ Хандановиќ на Инстаграм.

„Државата Србија официјално го поддржа ова барање. OФAЦ веќе реагираше со одредени коментари и се надеваме дека ќе го презентира својот став во текот на неделата. Времето истекува и мора да се најде решение, но граѓаните не смеат да страдаат и да останат без гориво. Ова нема и не смее да се случи“, нагласи Ѓедовиќ Хандановиќ.

Српскиот претседател Александар Вучиќ во саботата изјави дека очекува да испратат писмо до OФAЦ за ослободување на НИС од санкциите на САД.

„Очекувам, тоа е веста - дека во понеделник или вторник, заедно со Русите и некои други што руската страна ќе ги најде, ќе испратиме писмо до OFAC, владата на САД, и очекуваме одговор од нив, дали ќе прифатат, во рок од еден, два или три месеци, да нè ослободат од санкциите, бидејќи е јасно дека почнавме да го решаваме прашањето за управувањето. Дали подоцна ќе биде потребно да се реши прашањето за сопственоста, тоа останува да се види“, рече Вучиќ.

Нафтената индустрија на Србија беше ставена на листата на санкции на САД на 10 јануари, поради таканаречен „секундарен ризик“, односно поради мнозинското руско сопствеништво од 2008 година.

Во меѓувреме, сопственичката структура на НИС повеќепати се менуваше, но мнозинството акции и натаму се во рацете на руски компании.