Премиерот на Албанија, Еди Рама, изјави дека колку побрзо Србија ја признае Република Косово, толку подобро ќе биде за Србија и за сите други во регионот.
Премиерот Рама престојува во посета на Брисел во рамките на Форумот за проширување на Европската Унија, каде што учествуваше на панелот на тема „Постигнувањата на проширувањето: реформи, инвестиции и раст“.
Осврнувајќи се на националистичката песна на настанот во Брисел, во пресрет на Форумот за проширување на ЕУ, Рама ја оцени како нешто „лошо преку музиката“, за кое, според него, не треба да се дозволи да стане прифатливо зло преку молчење.
„Со години се залагам за тоа колку е важно за нашето соседство Србија да остане на страната на Европа. Сметам дека не треба да оставаме простор средновековните боишта да се претвораат во мобилизирачки песни. Колку побрзо Србија ја признае Република Косово, толку подобро ќе биде за Србија и за сите други“, изјави Рама.
Рама додаде дека, од друга страна, сите треба да се ангажираме за да го трансформираме регионот во согласност со сè за што зборуваме бидејќи, како што рече, „на крајот на краиштата, ние не бараме да дојдеме овде, туку бараме да ја донесеме Европа таму“.
На прашањето за европската перспектива на земјата и неодамнешните протести во неа, Рама рече: „Тоа е нова Албанија која бара повеќе. Луѓето имаат легитимно право да бараат поголемо внимание.“
Форумот е посветен на напредокот на земјите кандидати за членство во ЕУ, годинашниот Пакет за проширување и перспективата за поширока и поотпорна Европска Унија.






















