Претседателот на Србија, Александар Вучиќ, изјави дека заедно со Израел ќе произведуваат беспилотни летала и дека неговата земја ќе ги има најдобрите дронови во овој дел од светот.
На прашањето на новинарите да ги коментира поединечните тврдења дека Израел сам ќе ја гради фабриката за дронови во Србија, Вучиќ возврати „дали тоа е пофалба или критика“.
„Јас мислам дека ме фалат. Ние не умееме да направиме беспилотни летала какви што умее да направи Израел. Јас се гордеам со тоа, заеднички ќе го работиме тоа, ќе биде половина-половина, 50-50. Тоа покажува дека ќе ги имаме најдобрите дронови во овој дел од светот“, рече Вучиќ.
Српскиот претседател во март најави отворање на фабрика за производство на напредни дронови во Србија во соработка со странски партнер.
„Наскоро ја отвораме првата фабрика за беспилотни летала во нашата земја, многу сериозни, од најсериозната светска продукција. Работевме и досега, како армија и како приватни компании, на различни склопувања на помали дронови, 'Комарец 1', 'Комарец 2', имате приватни компании што го работат тоа“, додаде Вучиќ.
