Две лица се убиени, а четворица други се ранети кога напаѓачот ги удрил со автомобил, а потоа ги бодел со нож пред синагога во северен Манчестер, соопшти полицијата, додавајќи дека осомничениот бил застрелан.

Според Би-Би-Си, полицијата извршила контролирана експлозија на местото на нападот. Се претпоставува дека станува збор за експлозивен елек, кој го носел напаѓачот.

Полицијата на Голем Манчестер прогласи „голем инцидент“ кратко по 9:30 часот наутро откако полицајците била повикани во синагогата на хебрејската конгрегација Хитон Парк во населбата Крампсал во северозападниот град.

Медицинските екипи пристигнале на местото на настанот каде забележале четири граѓани со повреди предизвикани и од возило и од убодни рани.

„Испукани се истрели од огнено оружје на полицијата на Голем Манчестер во 9:38 часот наутро. Еден човек е застрелан, за кој се верува дека е сторителот“, се вели во соопштението на полицијата.

Премиерот Кир Стармер рече дека е „згрозен од нападот“, а британски функционер потврди дека ќе се врати порано од разговорите со ЕУ во Данска.

„Фактот дека ова се случи на Јом Кипур, најсветиот ден во еврејскиот календар, го прави уште пострашно“, додаде тој.

„Моите мисли се со најблиските на сите погодени, а мојата благодарност оди до службите за итни случаи и сите што први реагираа.

Градоначалникот на Манчестер, Енди Бернам, изјави за Би-Би-Си дека градот се справува со „сериозен инцидент“.

„Во исто време, можам да дадам извесно уверување дека непосредната опасност се чини дека е помината и дека полицијата се справила со тоа многу брзо со неверојатна поддршка од членовите на јавноста и обезбедувањето на локацијата“, рече тој.

Бернам ги повика луѓето „да не шпекулираат на социјалните медиуми“, додека забележува дека еврејската заедница „ќе биде многу загрижена од веста“.