Уште деветмина Палестинци се убиени од оган на израелската армија во Појасот Газа во последните 24 часа, со што бројот на загинати од октомври 2023 година се искачи на 73.431 лице, соопшти денеска Министерството за здравство на енклавата.

Во соопштението Министерството наведe дека меѓу жртвите има шест лица убиени од израелските сили, две лица што им подлегнале на повредите и едно лице чие тело било извлечено од урнатините.

Министерството соопшти дека уште 36 лица се повредени во нападите извршени од израелските сили во последните 24 часа, со што вкупниот број на повредени се искачи на 174.437.

Медицински извор претходно за Анадолу изјави дека двајца Палестинци им подлегнале на повредите добиени од оган на израелската армија во Појасот Газа.

Изворот наведе дека еден Палестинец им подлегнал на повредите добиени во израелското гранатирање извршено вчера западно од Кан Јунис, во јужниот дел на Газа.

Друг Палестинец им подлегнал на тешките повреди добиени во израелски напад врз населбата Ал-Амaл во Кан Јунис неколку дена претходно, додаде изворот.

Во меѓувреме, локални извори за Анадолу изјавија дека израелски воени возила отвориле силен оган кон куќите и шаторите во кои биле засолнети раселени цивили во подрачјата јужно од Кан Јунис.

Израелската артилерија, исто така, испукала гранати кон бегалскиот камп Бурејџ и подрачјето околу мостот Вади Газа во централниот дел на Газа.

Во северниот дел на Газа, израелски возила отвориле силен оган кон палестински домови во Беит Лахија, додека интензивно артилериско гранатирање било извршено во истото подрачје, изјавија очевидци.

Нападите се извршени и покрај повикот на американскиот претседател Доналд Трамп, Израел да ги запре нападите врз Газа.

Во интервју за „Фокс њуз“ на 17 август Трамп изјави дека „Израелците не треба да напаѓаат во Газа. Хамас се согласи да го положи оружјето“ според неговиот план за ставање крај на војната во енклавата.

И покрај прекинот на огнот од 10 октомври 2025 година, во израелските напади се убиени 1.296 Палестинци, а повредени се 4.296 лица, според Министерството за здравство во Газа.

Покрај човечки жртви, Израел уништи околу 90 отсто од цивилната инфраструктура во Газа, а ОН проценија дека трошоците за обнова ќе изнесуваат околу 70 милијарди долари.