Претседателот на САД, Доналд Трамп, рано  утрово изјави дека „многу наскоро“ ќе биде организирана средба меѓу рускиот претседател Владимир Путин и украинскиот претседател Володимир Зеленски. Тој исто така одби да ја исклучи можноста за дополнителни американски напади врз Иран по изборите во САД што ќе се одржат следната недела.

Обраќајќи им се на новинарите по враќањето од предизборни собири во Тексас, Трамп рече дека за двата конфликти разговарал со државниот секретар Марко Рубио и со специјалниот пратеник Стив Виткоф, додека патувале во претседателскиот авион „Ер форс ван“.

„Мислам дека постигнуваме голем напредок во однос на Русија и Украина. Многу наскоро ќе биде организирана средба“, рече тој.

На прашањето кој ќе присуствува, Трамп одговори: „Претседателот Путин и претседателот Зеленски“, без да наведе дополнителни детали за времето, локацијата или форматот на средбата.

Москва и Киев последен пат водеа мировни преговори со посредство на САД претходно оваа година – во јануари и февруари, кога се одржаа три рунди разговори во Абу Даби и Женева. Средба меѓу претседателите на двете земји би била без преседан од почетокот на војната во 2022 година.

Осврнувајќи се на Иран, Трамп тврдеше дека Техеран сака да постигне договор со САД, но ги одложува преговорите – веројатно до завршувањето на изборите на 3 ноември.

„Мислам дека во однос на Иран сме во многу добра позиција. Прашањето е само: кога сакам јас да ставам крај на тоа?“, рече тој, повторувајќи ги своите неодамнешни ставови за конфликтот.

На прашањето дали планира дополнителни напади врз Иран по изборите, Трамп одби да даде конкретен одговор.

„Сè е можно, но не можам да ви кажам“, рече тој.

Конфликтот меѓу Вашингтон и Техеран започна кон крајот на февруари со американско-израелски напади врз Иран, што предизвика поширок регионален судир. И покрај постигнатиот прекин на огнот и договорот за финализирање на мировен спогодба, ситуацијата останува нерешена.