Украинскиот претседател Володимир Зеленски синоќа во Ереван за време на средбата со британскиот премиер Кир Стармер изјави дека Украина е подготвена за следната рунда преговори во трилатерален формат за завршување на војната.

Зеленски во објава на Фејсбук изјави дека со Стармер разговарал за потребата од постигнување праведен и достоинствен мир за Украина.

„Ние во Украина ги цениме сите чекори што ги презеде Велика Британија за поддршка на нашиот народ и ослабување на агресорот, особено во борбата против руската флота во сенка“, рече Зеленски.

Тој рече дека со Стармер разговарал и за поддршката на енергетскиот сектор на Украина.

Зеленски, исто така, ѝ се заблагодари на Велика Британија за обуката на украински војници.

Тој особено му се заблагодари на британскиот крал Чарлс III за неговите зборови за поддршка на Украина за време на неодамнешниот говор пред Конгресот на САД.

Стармер ја повтори поддршката на Велика Британија за Украина и украинскиот народ и го изрази своето почитување за непоколебливата храброст на војниците на фронтот и цивилите.

Зеленски е во Ереван за да учествува на 8. самит на Европската политичка заедница (ЕПЗ), кој започнува денес и ги собира лидерите на 48 земји, а со него ќе претседаваат претседателот на Европскиот совет, Антонио Кошта, и ерменскиот премиер, Никол Пашинјан.