Гувернерот на Калифорнија, Гевин Њусом, денес изјави дека ќе ја тужи администрацијата на американскиот претседател Доналд Трамп за распоредувањето на Националната гарда за сузбивање на протестите во Лос Анџелес против рациите на федералните имиграциски служби.

Гувернерот изјави дека тужбата што ќе ја поднесе утре ќе ја оспори одлуката на Трамп да ја користи Националната гарда на Калифорнија без одобрение од таа држава, што досега ретко се забележува во историјата на САД.

„Доналд Трамп ги создаде условите што ги гледате на вашите телевизиски екрани. Тој ги влоши условите и запали кибрит. Тој додава масло на огнот откако објави дека ќе ја преземе Националната гарда на Калифорнија, што е нелегален, неморален и неуставен чин“, рече Њусом.

Тој прецизираше дека во извршната наредба на Трамп, според која дејствуваше Министерството за одбрана, конкретно било наведено дека тие морале да ја координираат акцијата со гувернерот на државата, а тие тоа не го сториле.

Њусом потсети дека неколку пати ја распоредил калифорниската Национална гарда во претходни вонредни ситуации.

„Немаме проблем да соработуваме во заеднички систем со локалните органи за спроведување на законот. Сепак, постои протокол, тоа е процес“, истакна гувернерот, додавајќи дека на Трамп не му е гајле за тоа и лаже.

Њусом потсети дека Трамп напишал во објава на својата социјална мрежа Вистина во неделата дека Националната гарда одлично си ја завршила работата, а како што истакнал, државните сили дури и не биле распоредени во тоа време.

„Тоа е орвеловски, едноставно да ги излажете луѓето, тоа е неуставно, тоа е нелегално, тоа создаде хаос. Сега се обидуваме да го расчистиме тоа“, додаде гувернерот.

Запрашан да ја коментира изјавата на директорот на Агенцијата за имиграција и гранична контрола, Том Хоман, кој посочи дека не ја исклучува можноста за апсење на Њусом, или на градоначалничката на Лос Анџелес, Карен Бас, доколку се мешаат во неговите постапки, гувернерот на Калифорнија рече дека воопшто не е загрижен за тоа.

„Дојди да ме уапсиш. Ајде да го направиме тоа Том“, рече тој, истакнувајќи дека воопшто не го интересира, но се грижи за својата заедница.

Демонстрантите кои излегоа на улиците во центарот на Лос Анџелес во неделата претежно се разотидоа откако Полициската управа на Лос Анџелес го прогласи центарот на градот за „нелегално место за собирање“, објавија американските медиуми претходно денес.

„Присуството на органите за спроведување на законот не попушта. Пред неколку моменти, на местото на настанот пристигнаа повеќе засилувања, вклучувајќи и оклопно возило од шерифската управа. Полицијата на Лос Анџелес е исто така тука, блокирајќи ја улицата, а веднаш зад нив може да се види кордон од членови на Националната гарда како патролираат“, објави Си-Ен-Ен.

Полициски хеликоптери го следат подрачјето каде што се одржаа протести во неделата, за време на кои беа уапсени најмалку 27 лица за фрлање молотов коктел врз полицајци и залетување со мотоцикл во полициски кордон.

Американскиот претседател Доналд Трамп нареди распоредување на 2.000 членови на Националната гарда во Лос Анџелес со цел да се смират протестите против имиграциската политика.