Унапредување на економската соработка, привлекување нови инвестиции, зголемување на трговската размена и реализација на конкретни проекти од заемен интерес. Ова беа клучните теми на разговор меѓу македонскиот и унгарскиот премиер Христијан Мицкоски и Виктор Орбан на нивната средба во Будимпешта.

„Двајцата премиери разговараа и за инфраструктурната поврзаност, енергетската стабилност и регионалната соработка, оценувајќи дека во услови на глобални предизвици, силните партнерства се клучни за обезбедување стабилност и развој. Во однос на европската перспектива беше нагласено дека процесот на интеграција треба да се темели на принципиелност и мерит-систем”, се вели во соопштението на македонската влада.

На средбата беше посочено дека партнерството со Унгарија не е формално, туку суштинско и засновано на доверба, заеднички вредности и конкретна соработка. Двете земји, како што беше истакнато, градат стратешки сојуз насочен кон економски развој, политичка поддршка и заедничко справување со предизвиците на современото време.

Премиерот Мицкоски како што се вели во соопштението на Владата ја истакнал и вредносната димензија на односите меѓу двете држави, нагласувајќи дека заедничките вредности семејството, традицијата и зачувувањето на националниот идентитет претставуваат темел на стабилни и просперитетни општества.

Во рамки на посетата, премиерот Мицкоски се обрати и на настан во организација на Mathias Corvinus Collegium, каде што говореше за значењето на лидерството, визијата и храброста во време на сериозни европски и глобални предизвици.