Албанија ќе продолжи со изградбата на луксузното одморалиште на зетот на американскиот претседател Доналд Трамп, Џаред Кушнер, и покрај протестите поради неговото влијание врз животната средина, изјави денес албанскиот премиер Еди Рама.

Рама изјави за Ројтерс дека делови од одморалиштето би можеле да бидат отворени за јавноста до крајот на деценијата.

„Ви велам, тоа ќе биде прекрасен проект и ние ќе го направиме тоа и ќе бидеме горди што ќе придонесеме за Европа. Јас бев избран да ги остварам овие работи. Не бев избран да ме водат луѓе кои имаат поинаква идеја за тоа како да се развие земјата“, рече Рама.

Инвестициската фирма на Кушнер „Афинити партнерс“ е вклучена во проект за изградба на луксузно одморалиште вредно 1,4 милијарди евра, во близина на заштитеното подрачје Вјоса-Нарта, и уште едно на блискиот остров Сазан.

Рама рече дека проектите заедно вредат до пет милијарди евра и дека „тоа е голем сон“ и дека „големите соништа отсекогаш биле предмет на контроверзии“.

Рама додаде дека проценката на влијанието врз животната средина сè уште не е направена и ќе се прави паралелно со работите.

„Многу сме горди на она што го направивме за дивиот свет во Албанија. Европската комисија нема причина да се сомнева во нашата цврста волја да заштитиме сè што мора да се заштити, кога станува збор за дивеч и природа“, рече Рама.

Илјадници луѓе учествуваа во еднонеделните протести во главниот град Тирана и на брегот каде што се планира да се изгради одморалиштето, барајќи проектот да се откаже поради влијанието врз заштитеното мочуриште кое е дом на фламинга, фоки и места за гнездење на морски желки.