Украинскиот претседател Володимир Зеленски денеска го повика светот да одговори на синоќешниот напад од страна на Русија и истакна дека во текот на ноќта руските сили ја таргетирале Украина со 242 дронови и 22 крстосувачки ракети, вклучувајќи и ракета со среден дострел Орешник.

„Вкупно, синоќа имаше 242 дронови, само балистички ракети, и тоа конкретно против енергетски и цивилни инфраструктурни објекти - 13, една балистичка ракета со среден дострел Орешник, како и 22 крстосувачки ракети. Нападот беше извршен точно во моментот на значително заладување. Точно против обичниот живот на обичните луѓе“, напиша Зеленски на Телеграм, пренесува украински Интерфакс.

Според него, рускиот напад врз Украина во текот на ноќта потврдува дека поддршката на воздушната одбрана е постојан приоритет за Украина.

„Потребен е јасен одговор од светот. Пред сè, од Соединетите Американски Држави, на кои Русија навистина смета. Русија мора да добие сигнали дека нејзина должност е да се фокусира на дипломатијата и да ги чувствува последиците секој пат кога повторно ќе се фокусира на убиства и уништување на инфраструктурата“, нагласи Зеленски.

Тој истакна дека се презема сè што е можно за да се врати греењето и електричната енергија за луѓето.

„Денес ќе има состанок на Енергетскиот штаб, каде што очекувам извештаи за сите детали од работите околу поправките - рокови, потребна опрема, одговорни лица“, додаде Зеленски.

Во текот на ноќта, главниот град на Украина беше подложен на голем воздушен напад, во кој беа убиени четири лица, а повредени беа најмалку 24 граѓани, вклучувајќи петмина вработени во Државната служба за вонредни ситуации и тројца медицински работници кои работеле на местата на нападите.