Иранскиот министер за надворешни работи, Абас Аракчи, утрово изјави дека масовните протести низ целата земја се „целосно под контрола“.

Во коментарите што ги пренесе Ал Џезира, на која ѝ беше дозволено да продолжи со известувањето и покрај прекинот на интернетот во земјата, Аракчи рече: „Подготвени сме за војна, но и за дијалог“.

Во остри изјави, Аракчи ги обвини Доналд Трамп и Израел за насилство во неговата земја.

„Протестите станаа насилни и крвави за да му дадат изговор на американскиот претседател да интервенира“, рече тој.

Тој додаде дека интернет услугите ќе бидат обновени во координација со безбедносните власти.

Во немирите во Иран биле убиени повеќе од 500 луѓе, а околу 10.000 се приведени, објавија групите за заштита на човековите права.

Иранските власти ги обвинуваат САД и Израел за поттикнување на немирите што започнаа на 28 декември поради зголемувањето на цените и се претворија во протест против верските водачи кои владеат со земјата од Исламската револуција во 1979 година.

Генералниот секретар на ОН, Антонио Гутереш, во неделата ги повика иранските власти да „покажат максимална воздржаност“ поради смртоносните протести што ја потресуваат земјата.

„Шокиран сум од извештаите за насилство и прекумерна употреба на сила од страна на иранските власти против демонстрантите што резултираа со смртни случаи и повреди во последните денови“, напиша тој на X.

„Правата на слобода на изразување, здружување и мирно собирање мора целосно да се почитуваат и заштитат“, додаде тој.

Гутереш ги повика властите да „покажат максимална воздржаност“ против непотребна или непропорционална употреба на сила.

„Исто така, повикувам на чекори што овозможуваат пристап до информации во земјата, вклучително и враќање на комуникациите“, додаде тој.

Претседателот на САД, Доналд Трамп, во неделата изјави дека Иран наводно побарал да започне преговори со Соединетите Американски Држави, бидејќи земјата се соочува со масовни протести во кои загинаа стотици луѓе.