Иранскиот претседател Масуд Пезешкијан изјави дека блокадата на пристаништата во неговата земја од страна на САД е „осудена на пропаст“ и само ќе ја влоши нестабилноста во Заливот.

„Секој обид за воведување поморска блокада е спротивен на меѓународното право (...) и е осуден на пропаст“, рече Пезешкијан, откако висок функционер на Белата куќа го спомена можното продолжување на блокадата „за неколку месеци“.

Иако ваквите информации придонесоа за нагло зголемување на цените на нафтата, иранскиот претседател рече дека ваквите мерки на блокада „не само што не ја подобруваат регионалната безбедност, туку се извор на тензии и влијаат на нарушувањето на долгорочната стабилност во Персискиот Залив“.

Во пораката по повод Националниот ден на Персискиот Залив, објавена од Тасним, Пезешкијан нагласи дека водниот пат е „неразделен дел од иранскиот идентитет“ и симбол на суверенитетот на земјата.

Тој укажа на растечкото глобално значење на Ормускиот теснец во енергетските и безбедносните прашања.

Зборувајќи за регионалната безбедност, иранскиот претседател ги пофали поморските сили на Иран, велејќи дека нивната улога ја покажува решеноста на Техеран да ги заштити клучните транспортни и енергетски правци.

Пезешкијан ги обвини надворешните актери за користење економски и поморски притисок врз Иран, оценувајќи ги таквите стратегии како спротивни на меѓународното право, предупредувајќи дека САД и Израел ќе бидат одговорни за каква било дестабилизација во Персискиот Залив.

Тој нагласи дека Иран ја поддржува слободата на пловидба, но верува дека долгорочната стабилност во регионот може да се постигне само преку соработка на крајбрежните држави и намалување на присуството на странски сили.

Иако прекинот на огнот е во сила од 8 април, САД воведоа блокада на иранските пристаништа на 13 април. Во такви околности, иранските вооружени сили одлучија да ја задржат контролата врз Ормутскиот теснец, низ кој минуваше една петтина од светските јаглеводороди пред конфликтот.

„Нема да ја толерираме поморската блокада. Ако продолжи, Иран ќе возврати“, предупреди на државната телевизија Мохсен Резаи, поранешен командант на Револуционерната гарда, кој беше назначен за воен советник на новиот врховен водач, Моџтаба Хамнеи.

Министерот за нафта Мохсен Пакнеџд го минимизираше влијанието на блокадата предводена од САД, велејќи дека таа „нема да даде никакви резултати“.

„Вработените во нафтената индустрија работат неуморно за да обезбедат непрекинато снабдување“, рече тој.

Кина, Индија, Јапонија и други земји плаќаат транзитни такси на Иран за да минуваат низ Ормутскиот теснец и да продолжат да купуваат нафта и покрај санкциите на САД, изјави во четврток ирански пратеник.

Џафар Кадири, заменик-претседател на Економскиот комитет на иранскиот парламент, изјави дека овој тренд покажува дека меѓународната побарувачка за ирански енергетски производи сè уште постои и покрај растечкиот притисок.

Тој изјави дека Вашингтон предупредил дека секоја земја што му плаќа на Иран за транзит низ Ормускиот теснец може да се соочи со строги санкции.

„Сепак, гледаме дека разни земји ги плаќаат овие такси и продолжуваат да купуваат иранска нафта и нафтени производи без оглед на ограничувањата на Белата куќа“, рече тој.

Кадири додаде дека извозот на иранска нафта продолжува да стигнува до глобалните пазари и покрај санкциите и морската блокада.

Статусот на Ормутскиот теснец беше една од главните точки на несогласување меѓу Техеран и Вашингтон за време на неодамнешните разговори во пакистанскиот главен град Исламабад.

Прекин на огнот беше прогласен на 8 април со посредство на Пакистан, по што на 11 и 12 април се одржаа разговори меѓу двете страни, но не беше постигнат договор.

Иако примирјето првично требаше да истече на крајот на април, подоцна беше продолжено од американскиот претседател Доналд Трамп, додека дипломатските напори за продолжување на преговорите продолжуваат.

Од 13 април, Соединетите Американски Држави спроведуваат поморска блокада насочена кон иранскиот поморски сообраќај во Ормутскиот теснец.